روزِ زیبون آبیگی ده هزاره تاون کویته، پاکستان

آوال: علی تورانی

آزرگی اکیڈمی ۲۱ فبروری روزی زیبونی آبئی گی رہ اگہ از یگ دوور دہ شاری ایسلام آباد قد نومائیندائی ۱۷ زیبونائی پاکیستانی از آزرگی نومائیندگی کد، دہ ام‍زی روز دہ بلوچی اکیڈمی کوئیٹہ ام نومائیندائی اکیڈمی قد بلوچی اکیڈمی، راہ شون ادبی دیوان بلوچیستان و پشتو اکیڈمی روزی زیبونی آبئی گی رہ قتیکی برنامہ گیریفتہ ای رہ نیشتو دد کی ‍زیبو بلدے ازی نییہ کی اینسانا ای رہ وسیلے ام چیشمی جور کنہ بلکی گوئیندائی پگ زیبونا میتنہ کی یگدیگے خورہ تای جوری ددہ بلدے نیگا کدو و بال بور شوی زیبونای خو قتیگی کار کنہ. قد برنامائی ۲۱ فروری قتی آزرگی اکیڈمی یگ جمشود رہ دہ ازارہ ٹاون دہ توے خانے بیسم اللہ ام سریشتہ کدد کی ای جمشود دو بخش شودد. یگ بخش ا‍زی جمشود تورہ گوئی بود و بخشی دیگے شی قستہ گوئی. جارچی ازی جمشود نثار احمد کوہ‍زاد بود و تورہ گویای ازی برنامہ از دووری پشتو اکیڈمی قدرتو پورفیسر خلیل باور از دووری آزرگی اکیڈمی علی تورانی ، سیما سحر، عوض تورانی قد رزاق باتور بود. دہ اولنہ بخشی ازی جمشود اولنہ تورہ گوی آوال چی آزرگی اکیڈمی عوض تورانی دہ بارے فرقی فارسی قد آزرگی دستو کدہ گوفت کی آزرگی از نزری آوازا و گیرامری زیبو قد فارسی کلو فرق درہ.عوض تورانی ای رہ ام دستو کد کی لوزائی فارسی کی دہ مینکلی زیبونی آزرگی امدہ و آوازای شی بدل شودہ، او لوزا دیگہ از جوملے لوزائی فارسی دہ ایساب نمیہ. زیبو شیناسا ام امی رہ موگیہ کی لوزائی یگ ‍زیبو کی قد لوزائی دیگہ زیبو گڈ خوردہ آوازای شی بدل موشہ وا دیگہ لو‍زائی ‍زیبونی اولنہ نمومنہ بلکی ایسے زیبونی دویومنہ جور موشہ۔ عوض تورانی ای تورہ رہ وازے دستو کد کی اولوسی آزرہ باید سون دووری زیبون خو اوشرو کدہ دہ بارے زیبونی آزرگی کلو اوگل توگل کنہ تاکی فرقی ‍زیبونی آزرگی رہ از فارسی بور کدہ دہ بارے زیبون خو ایرادای خورہ ماکم کدہ بلدے بال بور شو کدون شی دیست دہ کار شونہ. دویومنہ تورہ گوی ازی جمشود سیما سحر بلدے اولوسی آزرہ ای تورہ رہ دستو کد کی آزرہ او قوم استہ کی خود خورہ قوم میگرہ لاکین تاسیل کدا قد تاریخ نیمیشتہ گرای ازی قوم بے ازی کی دہ بارے تاریخ خو خوب غوود چیگ زدہ بشہ یا ای کی از آر دوور شی تول ترزو و گز و پل کدہ بشہ دہ چابوکی آزرہ رہ دہ قتاری فارسی گویا شامیل کدہ کی ای کار دہ آقی آزرہ کٹہ جفا یه. سیومنہ تورہ گوی ازی جمشود قدرتو احمد کوہزاد میری ہزاره ‍‍‌‌ڈیموکرٹیگ پارٹی بود کی دہ بارے ازی تورہ گویی کد کی ادیبایی رقم رقم ‍زیبونا باید دہ مینکل خو یگ دیلی رہ دہ وجود بئیرہ و ادبیاتی زیبونایی یگدیگے خورہ ترجومہ کنہ تاکی قومایی کی دہ بلوچیستان زیندگی مونہ دہ رقم روقومی ‍زیندگی تیر کدونی یگدیگے خو پئی بوبرہ و بلدے بال بورشو کدونی پگ زیبونایی بلوچیستانی قتیگی کار شونہ. تورہ گوی ازی جمشود سر میری آزرگی اک‍یڈمی علی تورانی ای تورہ ره بال بور کد کی قومی آزرہ دہ دونیا از جوملے ازو قوما یہ کی تا تیس رہ دہ بارے زیبون خو دہ سری دو را ایستہ یہ و بے ازی کی دہ بارے رنگ اونگہ و گوزیشتے تاریخی غوود فیکر کدہ بشہ زیبون خورہ فارسی موگہ. علی تورانی گوفت کی آزرہ از ووروغی تورک استہ و تورکا دہ اید سری دونیا ام فارسی زیبو نییہ. اگہ آزرہ خود خو فارسی زیبو موگیہ باید مجبور موشہ کی خود خورہ آریا ئی جور کنہ کی امی کار رہ بازی کسا دہ ایران کدہ کی آزرہ ره آریا‍ئی و زیبون شی رہ فارسی جور کدہ. تا اندازہ رہ کی نام خورہ ام آریانپور یانی باچے آرین ایشتہ. چارومنہ تورہ گوی ازی جمشود پورفیسر خلیل باور ای تورہ رہ دستو کد کی دہ غیتای شی کی مو ریزہ بودی دہ ایسلامیہ اوسکول میخاندی و ای تورہ اید دہ مینہ نبود کی کس یگ قد دیگے خو نفرت یا کی دہ نامی قوم یگ از دیگے خو بد بور لہ موکد بلکی پگ دہ امنیت زیندگی تیر موکد. لاکین یالی او وخت امدہ کی دہ نامی فیرقہ گرائی وغیرہ مردومی یگ خانہ رہ یگ از دیگے شی دور کدہ.خلیل باور گوفت کی ای کاری ادیبا و نیمیشتہ گرا استہ کہ بلدے امنیت شاری کوئیٹہ دیست دہ کار شونہ و تکو کنہ کی قوما رہ یگ قد دیگے شی نزدیگ کنہ. پورفیسر از آزرگی اکیڈمی خوشی کشید کی جمشودی روزی زیبونی آبئ گی رہ گیریفتہ و ادیبای زیبونائی پشتو، بلوچی، برویی قد آ‍زرگی رہ دہ یگ مینہ جم کدہ کی دہ مینکل یگ دیلی پیدا شونہ. دہ آخیری برنامہ قستہ گویایی زیبونی آزرگی، بلوچی، برویی و پشتو و اردو نوربن و دیل شی قستای خورہ خاند کی نامای شی دہ پیدمو اووردہ موشہ:

قستہ گویای پشتو: پروفیسر خلیل باور و ڈاکتر نصیب اللہ سیماب

قستہ گوی برویی : ڈاکتر لیاقت و گل شیر سمالانی

قستہ گویای آزرگی: علی تورانی، قادر نائل، عزیز فیاض، ماسٹر مشتاق، علی ھمدم ، مصطفی ایلخانی، یاسین ضمیر، لیاقت عاجز، عباس رستمی، صوفیہ وفا، جواد آزرہ، سیما سحر، رازق کوہزاد، ایاز بے نام، امان التای، عوض تورانی و رزاق باتور.

In this article

Join the Conversation